Relax vs economic crisis

Dili paborable alang sa tanan sa kinatibok-an ang gideklarang taas nga Christmas vacation sa kagamhanan. Kung dili ta maghuna-huna og bahin sa kita, aw okey kaayo ang taas nga bakasyon kay at least taas-taas ang atong pahulay. Apan alang niadtong mga inadlaw kon daily basis ang sweldo , seguradong dako ang ilang alkansi gumikan kay sa kataas sa walay trabaho sa mga pabrika og mga establisemento wala usab silay makuhang suhulan sa mga adlaw nga walay trabaho.
Swerte lang ang mga Monthly basis ang sweldo kay bisan og walay trabaho insured na ang ilang suhulan sulod sa usa ka bulan. Gawas sa alkansi nga mahatud niini ngadto sa indibidwal nga empleyado, mas dako kini og epekto ngadto sa mga industriya. Kini tungod kay sulod sa pipila ka adlaw stop operation usab ang prodoksyon sa mga pabrika og industriya, nagpasabot nga wala nagtoyuk ang ligid sa dagan sa ekonomiya sulod sa taas nga mga adlaw.
Matud pa sa Regional Tripartite Wages and Productivity Board (RTWPB), moabot matud pa sa halos P70-billion ang mahimong mawala sa kita sa mga investors matag tulo ka adlaw nga bakasyon. Matud pa usab sa Makati Business Club Executive Director Alberto Lim, moabot sa P7 trillion ang nawala sa kita sa mga negosyante matag tuig og ang matag tulo ka adlaw nga walay operasyon ang mga negosyo moabot og P70 billion ang mawala sa ilang kita.Gawas niini dili usab makaayo sa ekonomiya sa tibook nasud ang kalit-kalit nga pagdeklara og special holidays sama sa gihimo sa Enero 2,2009 hinungdan nga miabot na hinuon og 11 ka adlaw ang bakasyon.
Ang gilantaw man god sa Palasyo sa Malakanyang mao ang torismo kay nagtuo sila nga makatabagn gihaopon sa ekonomiya ang taas nga holiday pinaaghi sa kitaon sa mga ressorts lakip na ang kita sa mga groceries, department stores og mga malls gumikan kay duna nay igong panahon ang mga empleyado sa pag-shopping. Tinuod nga makatabang kini, pero karon nga nangandam ta sa dakong unos sa ekonomiya hatud sa Global financial crisis, mas maayong praktikalan unta ang ilang panglantaw sa sitwasyon. Sa pagsulod sa bag-ong tuig, angayang ipalstar nang daan sa administrasyon ang mga holiday sa nasud sulod sa usa ka tuig aron mapangandaman sa mga negosyo.