![](https://blogger.googleusercontent.com/img/b/R29vZ2xl/AVvXsEgHf8Zdbg3Qql_3zS-4Me-3csIN444IvRBcz-hfW4QWndN1lYD33pO1rL_M6SrioKYQgZKiQ9LoQWVVZI9kLDt3AmZ28CMW__Bx5b8VpSJUtI6Qd0TwMR7-CvDOMDJEICXE9jbtM5eJrnu5/s400/Clipboard04.jpg)
Pagkahuman sa Pasko angayang kumustahon sa kagamhanang Arroyo kung giunsa kaha sa pagsaulog sa 4.3 milyunes ka mga pamilyang Pinoy ang ilang Pasko ilabina ang kung unsay ilang Noche Buena. Kini aron naay ideya ang iyang administrasyon kung unsa pay laing mga lakang aron matabangan ang maong mga pamilya nga natalang nakasinati og kagutom ilawom sa administrasyong Arroyo.
Mahinumduman nga migawas sa survey sa Social Weather Station (SWS) nga miabot sa 23.7-porsiento sa mga pamilyang Filipino ang gipanggutom kon katumbas sa 4.3 million sa katapusang qaurter ning tuiga. Mas taas kini og 2.2% kumpara niadtong Septiyembre nga usa ka indikasyon nga mas migrabe ang gutom sa Pilipinas og pagpamatuod usab kini nga tinuod ang usa ka international survey kundiin ika-upat ang Pilipinas sa tibook kalibutan nga dunay pinaka-daghang gipanggutom. Kadaghanan sa mga pasmado taga-Metro Manila lamang.
Sayod ta nga nakahan-ay na ang mga programa og proyekto sa kagamhanan alang sa sunod tuig ilabina nga nahuman na ang nasudnong budget. Apan angayang mas tutukan ni Pangulong Arroyo ang problema sa panginabuhian sa mga ordinaryo og mga kabus nga mga Filipino gawas sa mas lawom nga problema sa ekonomiya nga dala sa epekto sa global economic crisis nga seguradong mabati na nato sugod sunod tuig. Gawas sa national level , angayang ipadaplin usab sa mga lokal nga pulitiko og lideres sa Mindanao ang ilang mga pulitikanhong kahakog og pagkahubog sa gahum, mas maayo nilang tutukan ang pagtabang sa mga kabus. Angayan silang masayud nga kadaghanan sa nagkalisud-lisud sa Metro Manila taga Mindanao og Visayas nga nanimpalad nalang intawon sa kauluhan gumikan kay wala man sa’y ayo sa ilang mga probensya.
Ning panahon sa Pasko, atong kinasing-kasing nga gihangyo ang atong mga lider sa tagsa-tagsa ka lalawigan, siyudad og mga munisipyo sa Mindanao nga maghiusa dili alang sa ilang kaugalingong mga interes kundili alang sa kaayohan sa kinabag-an. Butangi pod og limitasyon ang inyong kahakog og mas maayong hatagan og gibug-aton ang pagtabang ilabina ang pagpangita og epektibong paagi nga makab-ot na ang kalinaw sa pipila ka bahin sa Mindanao.