Tulo ka adlaw na lang Pasko na. Magsadya ang mga Kristiyano sa pagkatawo sa Manunubos sa kalibotan. Sukad pa sa unang panahon, ang Pasko maoy pinaka- importante nga adlaw sa mga kristiyano. Gani mas importante pa kini kay sa panahon sa Semana Santa o sa adlaw sa kalagkalag.Alang sa milyones ka mga Kristiyanos sa tibuok kalibotan, ang adlaw sa pagkatawo ni Kristo usa ka pagpakita sa dakong gugma sa Ginoo ngadto sa katawhan sa kalibotan, bisan pa man sa ilang pagpakasala.
Taliwala sa atong kabolahan, makaingon usab ta nga dakong alaot ang kalibotan tungod kay dinhi mitugpa ang yawa nga maoy hinungdan sa pagpakasala sa katawhan. Apan bisan pa man niana, bolahan gihapon ang katawhan gumikan sa gasa gikan sa kahitas-an nga mao si Jesus Christ. Si Hesu Kristo gituyo sa kahitas-an pagpakatawo sa kalibotan aron lamang pagluwas sa katawhan gikan sa sala aron makabaton kita og kinabuhing walay katapusan. Kini maoy pinaka dakong gasa nga Iyang gihatag ngadto sa katawhan sa kasaysayan sa kalibotan. Usahay makapangutana ta ,unsa kaha kon wala pa gipakatawo si Kristo dinhi sa kalibotana? Unsa kahay dagan sa pagpuyo sa mga tawo dinhi ug asa kaha ang tanan mopadulong? Kini maoy pipila lamang ka mga pangutana nga lisod kaayo natong tugkaron tungod kay dili man kita makatubag niini.
Apan usa lamang ang tuyo sa Ginoo sa katawhan. Kini mao ang pagluwas kanato gikan sa pagkahitumpawak sa sala. “mao ba sure ka?” he..he..he! ato nalang i-agi og kumedya kay hapit na gyud ang adlaw sa Pasko. Bitaw! Pero mao gyud ni kanunay’ng giwale sa kapari-an og mga pastor kabahin sa pagpadala sa Ginoo sa bugtong niyang anak sa kalibutan. Tungod lagi sa iyang dakong gugma kanato, iyang gipadala ang iyang bugtong anak aron paggiya kanato ngadto sa matul-id nga dalan. Apan tungod kay ang tawo usahay mahisubay sa dautan nga dalan, giula ni Kristo ang Iya mismong dugo aron lamang nga makabaton kita og kaluwasan pinaagi sa pagpalansang sa krus. Gumikan lagi kay gihatag man sa Labaw nga Makagagahum ang Iyang anak kanato, angay usab kitang magmaya tungod kay kini maoy labing dako nga gasa gikan Kaniya. Tungod niana, karon mao ang panahon sa paghinatagay sa mga kristiyano.Subay usab niini, nagmaya ang tanan tungod lagi sa pagkatawo sa atong bugtong Manunubos, kinsa mao lamang ang naghatag og paglaum kanato alang sa kinabuhing dayon.
Hinuon, pipila seguro kanato ang wala gyud makahibalo kun natawo ba gyud si Kristo sa Disyembre 25, kay ako sa akong kabahin dili ko kaayo hanas sa Bibliya. Gani bisan tingali ang mga eksperto sa relihiyon ug sa kasaysayan sa kalibotan pabiling blanko sa tinuoray nga adlaw sa pagkatawo sa atong bugtong Manunubos. Dili nalang nato lalisan ning tinuod nga petsa sa pagka-tawo sa Ginoo, basta ang importante mao ang paghandom sa espiritu og tinuod nga bulok sa Pasko nga mao ang pagpinasayloay og paghinatagay nga maoy naglangkub sa balaanong gasa sa gugma. Alang sa uban, bongga ang pagsaulog sa Pasko tungod kay mao kini ang labing importante nga adlaw sa tuig. Apan alang usab sa uban, dili lamang Disyembre angay nga iselebrar ang Pasko kondili kada adlaw. Ug ang pagsaulog dili lamang pinaagi sa dagkong kumbira ug mga mahalong gasa kondili sa mga pag-ampo nga dili unta masayang ang ilang pagkinabuhi ning kalibotana.Bisan unsa pa man ang paagi sa pagsaulog sa Pasko, usa lamang ang tumong ug kini mao ang atong paghangop sa pag-abot sa bugtong Manluluwas.
Malipayong Pasko kanatong tanan
