Migawas sa unang round sa pagdungog sa Senate Blue Ribbon Committee ilawom sa chairmanship ni Senador Alan Peter Cayetano, kang kanhi Department of Agriculture(DA) Undersecretary Jocelyn "Jocjoc" Bolante nga knockout ang mga senador. Kini human wala gyud nalisang og natandog ang giilang architect sa Fertilizer Fund scam nga si Bolante sa mga inisog og init nga mga pangutana sa pagpuga sa mga senador kaniya.
Sukad sa pagsugod sa hearing alas 9:50-niadtong Huwebes sa buntag, wala natandog ang giingong masakiton nga si Joc-joc bisan sa napulo ka oras kining gilabatiba sa mga senador. Kalmado lamang kining mitubag sa mga pangutanan nga gusto niyang tubagon. Walay nahimo ang arogante og dala insulto nga mga pasikat sa mga senador sa pagpangutana kabahin sa anomalosong pundo nga gidudahang gigamit sa kampanya ni pangulong Arroyo sa 2004 presidential elections.Bisan gi-unsa og bali-bali sa pangutana nila ni senador Mar Roxas, Jingoy Estrada ,Pimentel, Alan Catyetano, Miriam Santiago, Legarda, Pangilinan, Pia Cayetano, Lacson, Enrile, Biazon og uban pa, migawas gihapon nga pilde sa unang hugna ang senado.
Maayo gyud ang pagka-plano sa mamahimong isulti lamang ni Bolante atubangan sa Senado, gani gi-abswelto pa niini ang Pangulong Gloria Arroyo nga matud ni Bolante, walay kalibutan sa pagpagawas sa nahisgutang pondo. Maayo kaayo nga mamakak ang kanhi undersecretary sa Agriculture Department. Nahulog nga "joke-joke’ lamang gyud ang nahisgutang hearing tungod kay kung dili gustong tubagon ni Bolante ang usa ka pangutana sa senador, igo lamang kining moingon nga wala siya’y kalibutan sa anomaliya tungod kay igo lamang matud pa nag-download ang iyang buhatan sa pondo sa ahensya nga alang matud pa sa farm inputs og farm implements.
Magpahigayon usab og kaugalingong bersyon sa imbestigasyon ang Ubos balay balauranan sa kamara kang Bolante. Unsa kaha ang atong malauman nga mamahimong tubag unya ni Bolante sa pagpakisayud sa mga kongresista nga ang uban raba kanila ang nakadawat sa ilang bahin sa P728-million nga fertilizer fund niadtong 2004.
Klaro na kaayong namakak si Bolante og ang iyang mga abogado hinungdan nga angayan unta nga gideretso na sa Senate Blue Ribbon Committee ang pag-contempt kang Joc Joc gumikan kay under oath kini sa iyang pagtestigo sa Senate probe. Klaro kaayo sa committee report sa 13th congress nga anomaloso ang pagpagawas og paggasto sa maong pondo basi usab sa findings sa Commission on Audit kundiin nasuta nga grabe ka over-priced ang pagpalit sa liquid nga mga abono, gipagawas pa gyud kini panahon sa ting-ani og wala niagi og bidding ang pagpili sa supplier. Wala tay laing mahimo niini nga kaso kundili maghulat sa mamahimong sangputanan sa imbestigasyon sa duha ka balay balauranan sa kongreso.
Samtang kagahapon , mitahan na usab kang Senador Panfilo Lacson si kanhi PNP Comptroller Gen. Eliseo Dela Paz kinsa hugtanong mibarog nga wala niini gilikayan ang pag-aresto kaniya sa Senado. karong adlawa si De La Paz na usab ang labhan s mga senador kabahin sa pagkalambigit niini sa Moscow scandal. Wala kini nagpagawas og bisna gamay’ng pamahayag sa Media kagahapon s hapon og iyang gipanugon lamang sa mga staff sa Sergeant at arms sa senado nga karong adlawa na lamang siya motubag sa imbestigasyon sa mga senador. Kita nanghinaut nga matin-awan na ang kadudahang mga kalihukan og pagpadagan sa operasyon sa kapulisan .
