Wala nagsilbe ang unang palusot sa PNP nga ang milyones pesos nga baon ni Dela Paz cash advance sa retiradong Heneral og contingency funds sa mga delegado sa PNP sa Interpol conference sa St. Petersburg, Russia. Tungod niini gusto napud nga pagawason sa PNP nga ang nahisgutang kantidad gahin aron ipalit og mga intelligence equipment.
Wala man gud motuo sa unang mga statement sa PNP og DILG mao nang nag-imbento na usab sila karon og laing pamahayag kay sa ilang pagtuo nga naay motuo.Bugtong proseso lamang ang kayang ilaron sa PNP og dili ang mga Pilipino gumikan kay gihusgahan na sa publiko ang Euro generals gumikan sa nagkatibolaag nilang pangatarungan human naboking ang anomaliya. Nganong makaingon ta nga anomaloso? Halata ra man gud kaayo ang inconsistency sa ilang mga pagpasabot unya naglikay pa si Dela Paz aron ba dili siya magisa sa mga senador.
Ang kuyaw ani kung kalit na lamang ma-absuwelto si Dela Paz sa nahisgutang eskandalo gumikan kay imbes nga seryuso ang PNP leadership nga silotan ang opisyal gumikan sa pagkuha og kuwarta sa organisasyon nga walay pagtugot, mura na man hinoon og nagtinabangay sila paghinlo sa pangalan sa retiradong heneral.Mao usab kini ang gikabalak-an sa pipila ka mga magbabalaud sa kongreso.
Makaduda ang gipakitang aksyon sa DILG og PNP leadership sa kaso ni Dela Paz, murag ila gyung gipanalipdan ang heneral kay kung dili nila ni atimanon, basin og mokanta na hinuon ni og daghang madamay sa PNP og lakip na sa Malakanyang. Kung magduda ta sa ilang lihok, dili ta mabasol sa, PNP gumikan kay walay klaro ang ilang mga katarungan unya nagtago pa si Dela Paz. Seguro nagtuon pa sila og lig-ong rason nga hingpit gyud nga malutsan sa opisyal ang eskandalo nga wala lamang naghatag og kaulawon dinhi mismo sa nasud kundili sa tibook kalibutan.
