Dili matud pa igo ang napulo ka oras nga piniliay hinungdan nga gisugyot karon sa church-based election watchdog nga Parish Pastoral Council for Responsible Voting (PPCRV) sa Commission on Elections (Comelec) nga himoong duha ka adlaw o sobra pa ang pagbotar sa umalabot nga 2010 National elections.
Gipalutaw sa PPCRV ang sugyot nga usbon ang naandan nang napulo ka oras nga pagbotar og angayan na matud pa kining lugwayan pa aron makuha ang mas daghang ihap sa mga botante nga intresadong mobotar. Mas mayo usab seguro nga kuhaan og pattern sa Comelec ang sistema sa botohay sa Estados Unidos kundiin tugutan ang mga botante nga mobotar usa ka adlaw adiser ang adlaw nga gitakda ang election day.
Ang maong punto ang lakip nga gihingusgan sa PPCRV nga kanunay’ng nagbantay sa dagan sa eleksyon sa nasud isip election watchdog sa nasud. Daghan ang nagpadayag og pagsupak sa maong sugyot sa church-based nga kahugpungan, apan ilang gipasabot nga dili mamahimong dalan aron mas mo-grabe pa ang kaso sa election cheating kung patas-an ang panahon sa pagbotar sa mga botante sa election.
Hinuon sa katarungan sa PPCRV, dili ikalalis nga kung anaa gyud ang tikas sa elsksyon, bisan pa og napulo ka adlaw, usa ka adlaw, duha ka oras o usa ba kaha ka oras ang piniliay dili gyud mawala ang tikas sa mga pulitiko. Kini maoy katungdanan natong tanan lakip na ang mga grupo sa NAMFREL, PPCRVB og uban pang organisasyon nagtumong pagbantay sa mamahimong dagan sa election.Apan ang ato lang gipanghinaut nga mas hugtan pa sa maong mga grupo ang pagbantay gumikan kay kung tinguha sa Comelec nga ma-computerized ang pagbotar sa mga botante sa 2010 national elections, seguradong mas nagka-hitech na usab ang mga mudos operandi sa mga pulitikong hakog sa gahum nga buhaton lang gyud ang tanan aron lang makab-ot ang gustong posisyon sa gobyerno.
Suportado usab nato ang tinguha sa Comelec nga magtakda sila og obligadong presidential og vice presidential debates sama sa naandan sa Estados Unidos. Kini aron madungog sa publiko ang mga tinguha og plataporma-de-gobyerno sa mga kandidato. Pinaagi man gud sa debate, masukod og matimbang-timbang sa mga electorate ang gibug-aton og mga prayuridad nga concern sa mga pulitiko nga buot magpapili aron moserbisyo og "supposed to be" motabang pagpalambo sa nasud.
