Sama sa paghagit sa mga kongresista, atong hagtion ang mga pulitikong nagplano pagdagan sa umaabot nga 2010 Philippine Presidential elections , nga sundon ang gipakitang statesmanship nila ni senador John McCain og Barack Obama sa Amerika. Sa atong nasaksihan og nadungog sa malampuson og makasaysayanong General election sa Amerika kagahapon, angayang daygon ang sayo nga pag-concede ni McCain sa iyang kapildihan sa presidential race, dili pareha dibhi sa Pilipinas nga matag human sa eleksyon kung ang mga pulitiko ang pasultihon sila napilde kay gitikasan.
Bisan kinsa seguro kanato, nangandoy og naibog og nanghinaut nga mahitabo usab unta sa Pilipinas ang paspas og malinawon nga sistema sa piniliay sama sa Amerika. Dinhi nato makita bisan sa piniliay magkahiusa ang mga Amerikano hinungdan nga dili ikatingala nga mas paspas og mas domenante gyud ang ekonomiya sa Amerika sa tibook kalibutan. Kini gumikan kay kung asa ang kalinaw og kahiusahan anaa usab ang mas dali og paspas nga kalambuan.
Sa kadaugan ni Obama isip maoy pinaka-unang African-American og ika-44 nga presidente sa Estados Unidos, kita naglaum nga mas molig-on pa ang relasyon sa Amerika og Pilipinas.Dako ang laumang papel ni Obama sa kahimtang sa ekonomiya sa tibook kallibutan ilabina karon nga nag-atubang ang tibook kalibutan sa krisis pinansyal. Sa ato nang gikaingon dinhi, nga bisan unsaon nato paghuna-huna og pagtuki ang Estados Unidos maoy nagdala og dakong papel sa pagpadagan sa ekonomiya sa tibook kalibutan. Ang mga hiyas nga gipakita sa Black American , maoy gikinahanglan alang sa kasamtangang sitwasyon.
Apan taliwala niini, kitang tanan angayang mag-igmat og kanunay unta nga magkahiusa alang sa kaugalingon natong kaayuhan. Dili na unta mopasulabi pa sa matag Pilipino ang kahakog ilabin sa mga pulitiko ilabina nga nagkaduol na ang piniliay sa 2010.
