Kulba-hinam ang telenobela ni Joc-joc Bolante dihang gibuksan kini niadtong Huwebes sa Senado. Daghan kaayo ang excited niadtong tungura, pero samtang nagkadugay ang mga eksina( kapin pito ka oras lang ang telenobela kay nag-lunch break man pud sila kay basin mabughat ang bida nga gikan pa sa ospital), nag-anam ka klaro nga laing bersyon lang diay ni nga mga eksina sa milabay’ng halinon sab nga telenobela nga "Garci" editor’s cut. Ang nagka-pareho lang sa duha ka kontrobersiya nga tawgon nalang nato og telenobela, kay gi Garcillano og Bolante parehong mga taga-gobyerno og deperensya lang kay ang unang estorya gilambigitan sa taga-tig-ihap og boto matag eleksyon, samtang si Bolante gikan sa agrikultura.
Bisan manag-lahi ang ilang estilo sa kahiwian, pareho lamang sila nga nakahimo og sayop nga lisud kaayong depensahan og bestado kaayo sa mata sa publiko. Kung mahinumduman si Garci naka-sentro sa dagdag-bawas og na-wiretap pa ang estoryahanay nila sa iyang amo.Samtang ang kang Jocjoc may kalabutan usab sa abono nga ambot kung asa na nipadulong ang ubang pondo ang derektor lang ang nasayud, apan pareho lamang matud pa nga may kalabutan sa 2004 election ang gilambigitan sa duha. Pareho sab si Garci og Jocjoc nga taud-taud nga nagtago-tago og parehong gigisa sa kongreso.
Ang bida kanbiadto sa Garci, init og ulo og medyo mo-arangkada sa pabagaay og nawong, kalmado usab ang bida sa Fertilizer Fund scam og medyo dramatista. Ang makasubo lamang s unang telenobela kay walay pulos ang imbestigasyon sa mga senador kay wa gyud silay napuga. Seguro malipayon og nagkatawa karon si Garciliano nga nagtan-aw sa kasamtangang sitwasyon samtang atua sa iyang farm sa Bukidnon. Kung magpadayon usab ang tono sa kanta ni Bolante sa sunod nga round sa pag-gisa kaniya sa mga senador, murag delikadong mahisama gihapon ni sa ZTE broadband deal scandal nga wla gyuy nahitabo hangtud karon og murag nagsayang-sayang lamang sa iyang luha ang whistle blower sa ZTE scandal nga si jun Lozada. Hinuon kung ato gyud ning ikumpara sa salida, wala na’y pakialam ang mga artista og derektor kung nindot ang estorya sa ilang pelikula, ang importante nga milyunes na ang ilang kita gikan niini. Pero sa mata sa katawhan konbiktado na ang mga bida.
Kung atong pangutan-on ang katawhan, kinsa kaha ang motuo nga dili to si garcillano og pangulong Arroyo ang na-wiretap sa ilang estorya sa cellphone? kins kaha ang motuo nga walay gitaguang sekreto si Romulo Neri, diha nga mitak-om ang iyang baba sa ZTE broadband scandal? og bisan og unang chapter pa lamang sa "Jocjoc"(as in Joke-joke) biadtong Huwebes, na kahay motuo sa iyang mga depensa, nga mismong mga senador nga nag-imbestiga, wala gyud nituo human iyang gi-abswelto si pangulong Arroyo sa anomaliya.
Kagahapon gisalida na usab ang "premier" sa telenobela nga "Euro Generals" may kalabot kini sa mga dunay stars sa abaga nga kapulisan, nga kalooy sa Ginoo gidetine sa mga Russian sa Moscow human nsakpan nga nagbibit og minilyon nga kuwarta nga wala gideklara. Makalingaw nga makalagot ang unang chapter sa telenobela sa kapulisan kagahapon og feeling Bayani ang bida nga si retired PNP Comptroller nga si Gen. Eliseo De La Paz. Wala gyud niini gidamay sa anomaliya ang iyang mga superiors og kung kinsa mang mga nagpaluyo sa bisan mas gamay nga anomaliya, apan mihatag og dakong kaulawon og insulto sa institusyon sa mga tigpatuman og balaud og ti-protiher sa katawhang Pilipino nga mao ra usab ang milapas sa mga regulasyon nga angayang sundon sa pagpagwas og paggamit sa kuwarta sa gobyerno.
Daghan pang mga kulba-hinam nga mga eksina sa mga nobelang "Jocjoc" og the "Euro Generals" sa pagpadayon unya sa uban pang chapter sa estorya. Ang sitwasyon naghatag og mas dakong hagit sa bag-ong PNP chief nga si Gen. Verzosa aron pamatud-an og tul-iron og pabarugon ang nadagma nga kredibilidad og integridad sa Institusyon sa PNP. Moingon ta nga dakong hagit kang Versosa gumikan kay daw imposible nang matang-tang pa sa imahe sa PNP ang ilang pagka-kurakot og mga mangilkilay bisan asang bahin sa tibook nasud gikan sa ordinaryong pulis hangtud na sa kinatas-an sa PNP Hierarchy.
