Tukmang aksyon batok sa pabaya nga kapulisan, dili angayang ibalewala

Kontrobersyal og anaa karon sa “hot water” ang duha ka pulis gumikan sa pagaka-eskapo sa upat ka mga inmates gikan sa detention cell sa Sta. Ana Police Station sa Sta.Ana District, Davao City kaadlawon niadtong Domingo.Sa kumpirmasyon ni Sta.Ana police chief Senior Arnulfo Cabañog, nasayran nga wala sa police station sila PO1 Archie Celis og PO2 Rolito Valles dihang nakasibat ang mga piniriso.
Tungod sa kapabayaan sa maong mga duty police officers, nakahigayon ang mga binilanggo nga sila si Eunito Cabalida, suspek sa kasong car theft; Carlo Accompañado, nag -atubang og kasong frustrated murder; Rolando Ariola, nag-atubang og kasong robbery; ug Marvin Mag-usara, dakpan tungod sa illegal possession of firearms . Gigabas sa maong inmates ang rehas nga puthaw sa nahisgutang detention cell.
Namatikdan lamang ang nahitanong prison break sa Sta. Ana Police station dihang nakaabot ang ginsakpan sa Police patrol nga nagdala og mga dinakpan aron unta idugang og bilanggo,apan sa ilang kakurat wala na ang upat ka mga priso og wala ang duha ka pulis nga nagduty niadtong tungora.Hinuon sa pinaka-ulahing taho, nadakpan na ang pipila sa mga eskapo human sa gilusad nga pursuit operation sa kapulisan.
Angayang mopakita og political well ang liderato sa PNP-Davao pagdesiplina sa ilang kapulisan gumikan kay dakong kaulawon ang nahitabo nga prison break sa Sta. Ana police station. Taliwala sa padayong pagpahugot sa seguridad sa matag buhatan sa kapulisan, ang nahisgutang duha ka police officers ang namiya sa ilang buhatan. Dili lang basta-basta nga pag-abandona kining gibuhat nila ni PO1 Archie Celis og PO2 Rolito Valles sa ilang katungdanan nga nagkinahanglan gyud og hinanaling aksyon aron sila manubag sa aspetong administratibo.
Kining atong kapulisan usahay matingala ta kon nganong kanunay nalang malambigit sa mga kontrobersiya bisan sa padayong kampanya pagpalambo sa imahin sa PNP. Ang nasudnong kapulisan ang padayon na untang naka-rekober gikan sa ngil-ad nilang imahin gumikan sa dili maayong binuhatan sa ila ra mismong ginsakpan. Tungod sa nagkadaiyang kahiwian, gi-professionalized na karon ang PNP. Ang pagsulod sa organisasyon sa kapulisan dili sayon gumikan kay daghan kang agian nga kalisdanan gikan pa sa screening hangtud na sa trianing.
Bisan tuod dili kaayo dagko ang suweldo sa usa ka pulis, apan angayang magtinarong unta sila gumikan kay angayan silang ilhon nga atong mga tigpanalipud og bayani ning panahuna nga nagkadaiyang ang hulga sa kalinaw sa bisan asang bahin sa atong nasud. Apan unsaon nalang nila pagtuman sa ilang katungdanan kung sila mismo nga tigpatuman sa balaud malapason man usab sa balaud.
Kita nanghinaut nga dili konsintihon sa kadagkuan sa Sta.Ana Police station ingon man sa Davao City PNP ang kapalpakan sa duha nila ka sakop ngaklarong nakakumitar og abandonment sa ilang puwesto resulta nga nakalayas ang mga binilanggo. Dako gihapon ang atong pagsalig sa internal nga proseso sa PNP may kalabutan nining maong kaso

RP-Russia agreement posibleng apektado sa “Moscow scandal”

Daghan ang nabalaka nga maapektuhan ang nag-ong-ong nga kasabutan tali sa Pilipinas og Russian Federation gumikan sa eskandalong hatud sa pagka-hold sa Moscow ni kanhi PNP official Eliseo Dela Paz nga dunay dalang dakong kantidad sa kuwarta.Sa interview sa media human sa unang pagdungog sa Senate Committee on Foreign relations sa eskandalo nga gitawag og “Euro generals”, nagpadayag og kabalaka si Senador Miguel Zubiri nga dili mahinayon ang kasabutan sa Pilipinas og Russia alang sa pagtinabangay sa natad sa negosyo, seguridad og depensa , agrikultura, kampanya batok organized og transnational crime, paugnat sa kusog, siyensya og tekonolohiya, enerhiya og visa requirements ingon man legal assistance sa mga criminal matters. Mahinungdanon ang nahisgutang kasabutan aron mapakusog ang pagbinayloay og negosyo sa duha ka nasud og ang opurtunidad nga mobubo og pauhonan sa Pilipinas ang mga Ruso.Nasayran sa pagtuki nga sulod na sa lima ka tuig walay bisan gamay pamuhonan og negosyo nga gibubo ang mga Russians dinhi sa nasud. Matud ni senador Zubiri nga sayang ang potential investment sa Russian nga daghang mihaum sa atong mga panginahanglan sa Pilipinas sa lana, natural gas , power and energy. Sa natad sa negosyo ang Pilipinas nag-angkat og balor $190-million nga mga prodokto gikan sa Russia matag tuig samtang nag-export ang nasud og balor $18-million matag tuig. Pinaagi sa maong kasabutahn , dako kaayo ang posibilidad nga mas mapalambo pa ang Trade relation sa Pilipinas og Russia.
Gawas niini , posibleng maapektuhan usab sxa eskandalo sa “Euro Generals” ang tsansa ni Senadora Miriam Defensor Santiago nga mapili isip representante sa Pilipinas sa International court of Justice (ICJ). Posibleng kini maoy usa sa mga hinungdan nga nagbaga-baga sa kasuko si Santiago sa unang Senate committee hearing kagahapon kundiin wala mitunga ang kontrobersyal nga si Eliseo De La Paz hinungdan nga sila ra si DILG Secretary Ronaldo Puno og PNP Chief Director Gen. Verzosa ang gisabunan pag-ayo sa Senadora nga maoy committee chair sa komitibang midungog sa isyu.
Sa imbestigasyon kagahapon, parehong naghunaw na sila si Puno og Verzosa sa pagbit-bit sa “Euro generals” og halos P7-million sa Russia. nga wala lamang nakalapas sa administrative order ni pangulong Arroyo kabahin sa pag-travel sa mga PNP officials sa gawas sa nasud aron motambong og mga kalihukan may kalabutan sa pagpalambo sa PNP. Matud pa gani ni Senador Mar Roxas nga gilapas nila ni DILG secretary Puno og PNP Officials ang probisyon sa 2008 General Appropriations Act gumikan kay gidili sa maong probisyon sa GAA nga gastuhan sa gobyerno ang biyahe sa mga opisyal sa gobyerno nga hapit nang moretiro sa katungdanan. Basi sa maong balaud gidili gyud ang pag-pondo sa biyahe sa mga PNP o DND officials kung gikatakda na kining mag-retiro usa ka tuig human sa foreign travel, apan si De La Paz didto na naabtan sa termino sa iyang pag-retiro sa Moscow, Russia.
Kanselado una karong adlawa ang hearing sa senado kabahin sa isyu hangtud dili pa maresulta ang legalidad sa pagpasikop ni senadora Santiago kang De La Paz pinaagi sa gi-issue summon sa Sgt.at arms sa senado.