Kahuyang sa ekonomiya sa nasud klaro na

Taliwala sa gitaho sa gobyerno nga economic growth sa ika-tulong quarter sa 2008, ang nasud nagpabiling bukas og walay salipud og seguradong bullseye sa epekto s global economic crisis sa tuig 2009. kini maoy nasuta sa gihimong makuti ng pagtuon sa independent think-tank IBON Foundation. Ang gipagawas nga report sa NEDA sa tinuod lang mura ba og taphaw lamang nga salipud sa kahuyang sa lokal nga ekonomiya nga seguradong dili makasugakod sa gitawag nga external shocks gikan sa global economy gumikan sa pipila ka dekada nga pagsubay nato sa economic liberalization. Gipakita usab sa GDP figures ang klarong pagsalig sa atong ekonomiya sa dili lig-on nga tinubdan sa revenue nga mao ang dollar remittances sa mga Overseas workers og mga foreign investments, imbes nga palambuon og palig-onon unta sa kagamhanan ang kinaugalingong tinubdan aron makasustiner og makabarog sa kaugalingong mga tiil ang atong ekonomiya og dili kaayo maapektuhan kung duna may paglihok paubos sa Global economy. Matud pa sa NSCB, aNG 4.6% nga GDP growth record sa third quarter sa 2008 nagagikan sa kusog nga performance sa manufacturing, construction og Trade. Apan ang gi-ingong Growth sa manufacturing sector dili malungtaron og wala nagpasabot sa lig-ong kalambuan sa maong sektor. Partikular nga nakita sa maong tubo nagsumikad sa pagsaka sa gasto sa importasyon og ang double-digit nga pag-usbaw sa presyo sa mga pagkaon, nga miabot og 17% subay sa pagsaka usab sa inflation sa susamang higayon . Ang Construction og Trade, nga maoy usa usab sa nakitang gigikanan sa GDP Growth, nagsumikad sa pagtubo usab sa OFW remittances, nga nmakita sa murag nga uhong nga pagdaghan sa mga condominiums og pagsaka usab sa kunsumo sa mga pamilya sa mha OFW’s. Kini gumikan sa nadawat nilang padala sa ilang mga kabanay sa abroad. Gani gikumpirma sa gobyerno nga ang pagusbaw sa demand sa mga panginahanglan, nagsumikad sa household spending kon pagasto sa mga pamilya sa mga OFW’s dinhi a nasud. Apan ang nasinatiang global financial crisis ang seguradong mopakunhod sa OFW employment , gani karon pa lamang ubay-ubay nang mga OFWs sa lain-laing nasud sa tibook kalibutan ang nawad-an na og trabaho og gikabalak-an nga duna pay daghan sunod tuig ang matang-tang sa trabaho nga moresulta unya sa pagkunhod sa OFW remittances. Pinaagi sa maong mga kahuyangon nga naklaro na pinaagi sa Growth Domestic Product sa third quarter ning tuiga, bisna sa mga yanong lungsuranon masabtan kaayo nga ang tanang pag-usbaw sa kahimtang sa ekonomiya sa nasud temporaryo lamang gumikan kini sa epekto sa Trade liberalization og Global Trade. So kung mahagba ang ekonomiya sa ubang nasud kundiin tua ang daghang mga Pinoy nagtrabaho, seguradong maapektuhan ang atong dagan sa ekonomiya. Hangtud karon padayong gisubay sa kasamtangang administrasyon ang konsepto nga dili malungtaron . Kung mas napalig-on sa Pilipinas ang sektor sa agrikultura, dili gilayon madali-dali og katandog ang atong ekonomiya.