Kanabuhi sa mga broadcast journalist sa Pilipinas naglatay sa lugas sa lanot

Gumikan sa nahitabong pagpatay sa komentarista sa usa ka radio station sa Northern Samar ning milabay’ng adlaw, gitawag karon sa usa ka international media group ang Pilipinas nga pinaka-delikadong lugar sa Asya Pacific alang sa mga broadcaster sa radyo. Daghan nang mga taga-radyo ang gipamatay sa lain-laing bahin sa nasud nga wala pay kasulbaran . Tungod niini gipangayo-an og pagpasabot sa International Federation of Journalists (IFJ) si Pangulong Gloria Macapagal-Arroyo gumikan sa matud nila kakulangon sa paghatag og proteksyon sa gobyerno ngadto sa mga tigbalita."It is with great despair that we report the loss of another courageous journalist in the Philippines at the hands of murderers," base sa pamahayag sa IFJ Asia-Pacific. Dugang pa sa maong grupo, "The failure of Arroyo’s government to show true resolve in protecting journalists in the Philippines is a disservice not only to the media as a pillar of democracy but to the general public whose right to information these journalists defend." Ang IFJ ang gilangkuban sa 600,000 ka mga tigbalita sa 120-ka mga nasud sa tibook kalibutan.
Nakighiusa ang IFJ sa panawagan sa Philippine Press freedom community nga ipasabot ni pangulong Arroyo ang nagpadayon nga kakuyaw nga kanunay’ng nag-uban sa mga journalist sa nasud. Ang death toll sa mga tigbalita karon maoy pinaka-grabe ilawom sa bisa kinsang administrasyon lakip na sa rehemin ni kanhi Pangulong Ferdinand Marcos.
Maka-dismaya ang maong kamatuoran sa media killings sa lain-laing bahin sa nasud nga mas migrabe sa administrasyon ni pangulong Arroyo. Tungod niini sama sa awhag sa New York- based media watchdog group, hugtanong gi-awhag sa mga journalist sa nasud ang Arroyo administration nga molihok na batok sa nagka-grabeng pagpamatay sa mga tigbalita sa nasud. Gihatagan og pagtagad sa Committee to Protect Journalist (CPJ) ang kawalay testigo sa kamatayon ni Radyo Natin Commentator Leo Mila aron makahatag og clue sa imbestigasyon ingon man sa pagsikop sa suspek.
Hinuon dunay mga kaso sa media kidnapping nga resulta sa kaugalingong mga desisyon sa mga journalist sa tinguha nga makuha ang tukmang mga angulo sa estorya nga buot niining hiposon aron mapaabot sa publiko, pero pipila lamang kini ka kaso og natural na kini sa trabaho isip usa ka tigbalita. Ang kamatayon sa usa ka tigbalita nga binuhatan sa mga tawong naligsan sa mga isyung gituki diha sa pagtuman sa mandato isip journalist ilawom sa nasud nga gipadagan sa demokratikanhong sestema, dili mahimong pasagdan.
Angayan unta nga ang kamatayon ni Mila, magsilbe na untang pahinumdum sa Philippine National Police nga angayang paspas silang molihok ilabina sa imbestigasyon og protektahan ang mga journalist sa nasud ilabina kadtong dunay mga hulga sa kinabuhui tungod sa ilang trabaho.