Kalit nga kabag-ohan sa Senado kritikal

Ang kabag-ohan sa liderato sa Senado naghatud og mga kabalaka nga posibleng si Pangulong Gloria Macapagal Arroyo ang makabenepisyo niini og dako. Nagpadayag usab sa susamang kabalaka ang mga taga oposisyon sa kamara sa kalit nga kausaban sa dagan sa Senado.
Usa sa mga posibilidad nga atong nakita niining maong sitwasyon, mas sayon nang makapangita og paagi ang mga senador nga kaalyado sa Pangulo aron makuha-kuhaan og makunhoran ang pagtuli sa mga isyu nga dili pabopr sa administrasyon. Ang lain pang posibilidad nga dili layo nga mahitabo , mao ang subling pagbuhi sa isyu sa charter change ilawom sa liderato ni Senador Juan Pomce Enrile og ang pangulong Arroyo ang dako og benepisyo gumikan kay posible kining magpabilin pa sa puwesto human sa 2010.
Makaduda ang kudeta sa Senado og seguradong duna kini koneksyon sa pagsuporta ni kanhi Senate president Manuel Villar sa mga isyung kritikal sa administrasyon ilabina ang pagpirma niini sa warrant of arrest kang kanhi Agriculture Undersecretary Jocelyn “Jocjoc” Bolante ingon man ang isyu sa “Euro generals”. Hinuon dili naman bag-o ang mga susamang hitabo sa duha ka balay balauranan sa Kongreso gumikan kay nahimo na gyud ni nga kabahin sa politikanhong kultura sa Pilipinas nga kung dili man pinaka-dutan maoy pinaka-hugaw sa tibook kalibutan.
Kung atong lantawon, nagkaduol na gyud ang 2010 national elections og sa nahabiling mga panahon, dili malikayan ang kalit nga mga kabag-ohan dili lamang sa senado kundili bisan sa nagkadaiyang ahensya sa kagamhanan og ang pag sabotahe sa liderato ni Villar posibleng may kalambigitan usab sa iyang dayo nga deklarasyon pagpapili pagka-presidente sa 2010. Bisan og nasubo ang mga kaalyado ni Villar sa oposisyon sa senado, apan milampus na og ang mahinungdanon karon nga mabalik na sa subsub nga trabaho ang mga magbabalaud alang sa interes sa katawhan og dili una ang kaugalingon nilang mga kaayuhan lamang.
Dinhi nga sitwasyon angayang abtik og mabinantayon ang minority bloc sa Senado sa mamahimong sunod nga mga lakang sa mga kaalyadong senador sa Palasyo. Daghan kaayo ang ilang bantayanan may kabahin sa nagkadaiyang init og kritikal nga isyu nga gi-atubang sa mga Pilipino karon.