People Power, dili sulbad sa krisis karon

Gihangyo sa mga negosyante ngadto nila ni Catholic Bishop Conference of the Philippines (CBCP) President Angel Lagdameo og Archbishop Oscar Cruz nga tin-awon pinaagi sa sulat ang gihimo nilang pamahayag kalabot sa panawagan nila nga bag-ong gobyerno. Kini human gipakigsulti-an kagahapon sa hapon ni PCCI Chairman Emeritus Donald Dee si Lagdameo aron pangayoon ang pagpasabot sa statement sa mga obispo. Alayon niini, gitin-aw usab matud pa ni Archbishop Lagdmeo nga wala sila nanawagan sa pagbag-o sa kasamtangang administrasyon o klaha nanawagan og people power.Matud pa sa obispo, ang buot nilang ipasabot mao ang pagpangandam alang sa umalabot nga eleksyon og kinahanglang tudloan ang mga tawo sa pagpili sa mga bag-ong opisyal.Kining taga simbahan unta ilabina ang mga obispo sa nasud, angayang dili magpagawas og mga provocative statements ilabina ning higayona nga nag-ong-ong ang financial effect sa Global financial crunch dili lamng s Pilipinas kundili sa uban pang nasud sa Asya. Krusyal man gud kaayo ang tingog sa simbahan sa mga kritikal issues og ang statement sa CBCP nga angayang bag-ohon na ang gobyerno, posibleng makaapekto sa ekonomiya sa Pilipinas.Dako ang atong pagtahud sa simbahan, apan ang bisan unsang kalihukan karon batok sa kasamtangang gobyerno “wrong timing” og dili gyud makaayo sa kinatibok-ang sitwasyon sa nasud sa ekonomikanhong aspeto .
Kita nanghinaut lamang nga ang statement nila Lagdameo og Cruz ning milabaya’ng adlaw dili maoy tingog sa kinatibok-ang simbahang katoliko sa nasud. Kini gumikan kay sila unta ang angayang motulay paghilot sa espirituhanon og moralidad sa katilingban taliwala sa kagubot ilabina dinhi sa Mindanao. Daghan nang problema ang atong nasud og hinaut nga motabang ang simbahang katoliko pagpalig-on sa kadasig sa mga Pilipino pagsuporta sa kaayuhan sa kinabag-an. Ang pagbahin-bahin sa kasamtangan maghatud lamang kanato sa pang-pang sa kaalautan. Ang isyu sa mga kahiwian sama sa isyu sa Fertilizer fund scam og sa “Moscow scandal” ang ato na lamang itugyan sa atong mga magbabalaud og hingtungdang mga ahensya sama sa Senado og Umbudsman. Dinhi nga aspeto kitang tanan ang angayang magmabinantayon sa pagligid sa proseso sa hustisya. Ang pag-alsa sa katawhan sama sa milabay’ng mga People power, ang halos dili na sakyan pa sa mga Filipino gumikan kay hangtud karon pabiling wala matuman ang mga kabag-ohang gisaad sa pakigbisog sa kadalanan.