Dela Paz sacrificial lamp ba?

Gimando na ni Philippine National Police Chief Jesus Verzosa ang pagpaska og kasong kriminal sa Office of the Ombudsman batok kang kanhi PNP Comptroller Eliseo Dela Paz og laing tulo pa ka opisyal may kalabutan sa matud pa dili otorisadong pagpagawas sa dul-an P7-Million nga balor sa cash advance. Gimando usab ni Verzosa ang pagpasaka og kasong administratibo batok kang Dela Paz nga mahinumdumang gi-hold sa Russia gumikan sa pagdala og wala gideklarang kantidad sa kuwarta.Matud ni Verzosa nga gihimo sa mga opisyal ang pag-release sa pondo nga walay igong pagtugot gikan sa iyang buhatan hinungdan nga kinahanglang manubag ang mga nalambigit sa eskandalo.Lakip sa mga gipakasuhan og malversation of public funds mao sila si Ret. PNP Comptroller Eliseo Dela Paz, Finance service Dir. S/Supt. Orlando Pestaño, S/Supt. Tomas Rentoy og Supt. Samuel Rodriguez. Dungan niini, gipadala na usab ni Verzosa ang kopya sa ilang rekomendasyon sa buhatan ni Senate Foreign Relations Vice Chairman Mar Roxas ingon man sa buhatan ni Ombudsman Merceditas Gutierez.Ang nahisgutang mga kaso ang ipasaka sa Criminal Investigation ang Detection Group.Gawas niini, gimando usab ni Verzosa sa pito ka heneral nga nibiyahe sa Russia nga ibalik ang kinatibok-ang P2.1 Million nga gihatag kanila alang sa nahisgutang biyahe. Kung kasohan man lang ang mga PNP officials nga gibansagang “Euro generals” , angayang papanubagon usab ang Malacañang gumikan kay basi sa pinaka-ulahing katarungan sa Philippine National Police nga gamiton ang nahisgutang kantidad sa kuwarta nga dala nila Dela Paz sa Russia aron ipamalit og mga intelligence equipments. Mao usab kini ang reaksyon sa ubang mga senador, gani giklaro ni senador Chiz Escudero, nga basi sa balaud dili mapagawas ang intelligence fund kung wala kini pag-aproba sa presidente gumikan kay ang pangulo ang disburse-in-chief sa mga intelligence fund. Kun ugaling padayong mobarog ang PNP nga ang dla nilang kuwarta nga P6.9-Million gamiton pagpalit og spy equipments, segurado na nga ang paper trail naa sa buhatan sa pangulo nga nag-apruba sa pagpalit sa nahisgutang mga ekipos. Nakalatid ang maong argumento sa Section 20 sa General Provisions sa General Appropriations Act for 2008 nagkantar nga walay balor sa kuwarta nga puwedeng ipagawas alang sa confidential og intelligence activities, gawas kung gi-aprubahan sa pangulo sa nasud. Gawas niini, adiser aprobahan ang pagpagawas sa intelligence fund gikinahanglang dunay klarong rason ang requesting agency og makuti pa kining tun-an adiser aprubahan. Basi sa 2008 national budget, moabot sa P1.360 billion ang gigahin nga pondo alang sa confidential og intelligence expenses alang sa 20-ka mga ahensya og ang Office of the President ang nag-una sa listahan nga dunay pinaka-dako nga intelligence fund nga miabot og P650-million og ang P500 -million ang gigahin alang sa Presidential Anti-Organized Crime Commission.Gisaundan kini sa Philippine National Police nga dunay P270 million, Department of National Defense nga dunay P151.6 million, kundiin moabot sa P119 million niini ang gigahin sa AFP General Headquarters og sa tulo ka major armed services. Niini nga sitwasyon , murag mahulog nga sacrificial lamp si Dela Paz gumikan kay human nagkabuang s ilang katarungan ang PNP leadership ingon man ang DILG, nia karon pakasuhan na ni Verzosa si Dela Paz wala pa niatubang sa senado aron unta matin-awan ang katawhan sa tinuod nga punto kung asa gikan ang kuwarta nga ilang gidala sa Russia. Samtang karong adlawa makabalik na s nasud ang giingong arkitikto sa P728_million nga Fertilizer fund scam. Atong tan-awon ang mamahimong papel sa senado niini nga isyu human nagpagawas og kamanduan si Senate president Manny Villar nga ipa-aresto si kanhi agriculture Usec. Jocelyn “Jojjoc Bolante.