Kahayag luyo sa kangit-ngit

Dako gyud ang role sa media dinhi sa katilingban kay gawas nga nagsilbi kining ika-upat ng estado sa atong katilingban, nagsilbi kining catalyst diha sa pag-umol sa opinyon sa katawhan pinaagi sa awareness sa matag isyu og balita nga tukion sa kahanginan man o pinaagi sa imprinta nga mabasa sa katilingban. Usa sa mga benepisyong gihatud sa media sa kasamtangang dagan sa atong nasud , mao ang walay puas nga pagtutok sa mga isyu og anomaliya diha sa gobyerno.
Layo ang mamahimong padulngan karon sa kontrobersiyal nga kaso sa gibansagang “Alabang Boys” . Kini human gikonsidera sa Malacañang ang pagpa-review sa tanang gi-dismiss nga mga kaso kabahin sa drug trafficking. Tumong niini nga madetermina kung insakto o sayop ang pagkabasura sa mga kaso sa Department of Justice (DOJ), sa mga city og regional prosecutors partikular sa mga drug related cases . Mao kini ang bunga sa pag-alisngaw sa eskandalong gihatud sa “Alabang Boys”.
Sa maong kamanduan sa Palasyo, dako ang atong kalipay gumikan kay dako kining tabang ngadto sa mgha kabus og mga inosenteng nabalhog sa prisohan nga wala gyuy tinuod nga sala kundili na-frame up o kaha biktima sa mga planted evidence sa mga tampalasan nga mga taga-PDEA og uban pang law enforcement elements nga nagtinguha lamang og promosyon sa ilang mga ranggo.
Ang maong plano, daw silot usab ngadto sa kabahinan sa mga nakalusot na sa kaso bugti sa ilang pagpanuhol og pagpang-suborno sa mga “Fix-cal” este! fiscal og mga sakop sa DOJ tungod kay subli silang magukod aron manubag sa nahimo nilang pagpanglapas sa balaud. Usa kini ka sagpa sa kanhing l;iderato sa Department of Justice, angayan kini nilang dawaton sa dakong pagpaubos kay makatabang kini aron hinay-hinay’ng makabangon ang integridad sa atong mga korte nga sulod na sa dugay’ng panahon gilantaw sa kadaghanan nga usa sa mga corrupted institutions sa nasud. Bisan og hugot pang manghimakak ang mga tatga-DOJ og mga City, Municipal og Regional prosecutors, dili na mawala sa panghuna-huna sa katawhan ang ilang hulagway nga usa ka institusyon nga giharian sa mga hudloms in robe og “hudloms in barong”. Tinuod lisud kining pamatud-an kung ebidensya ang basihan, gumikan kay sila ang dunay igong kakapas sa pag-manipula sa balaud. Ang ato nalang dinhi mao ang panghinaut nga makonsensya na unta sila sa ngalan sa kahadlok sa Ginoo.
Tukma ang pag-ulbo sa “Alabang Boys” controversy tungod kay samtang may higayon pa mas maayong makurhian na ang mga kasaypanan og angayan nga karon na kini ipatuman. Kung anaa sa maayo ang tanan sa atong palibot, diba mas maayong magpakabuhi sa katilingban nga walay bisan unsa mang bahid sa anomaliya ilabina sa hisgutanan sa hustisya.
Kita nanghinaut nga dili lang unta ang isyu sa droga ang mahinloan kundili ang uban pang mga kaso nga mas mipahagba pa sa integridad natong mga Filipino. Kusganon natong gi-awhag ang tanang sektor nga suportahan ang krusada sa Media og bantayan usab ang mga unscrupolous elements niini nga dili mamahimong kataw-anan ang balaanong krusada pagbugtaw sa kamatuoran.