Due Process and the rule of law in vein

Gawas sa mas grabeng epekto krisis sa ekonomiya sa tibook kalibutan nga gikabalak-an nato nga mohapak ning tuiga sa atong nasud, makadismaya ang pagbuto sa eskandalo tali sa Department of Justice (DOJ) og Philippine Drug Enforcement Agency (PDEA). Murag makapanglimabawot sa balhibo ang sinukliay og mga akusasyon tali sa mga opisyal sa gobyerno. Makapahingangha ang nabulgar nga minilyon nga kantidad sa suborno. Tungod ning maong mga hitabo nga nag-ugat sa pagkasikop sa mga batan-ong gibansagang “Alabang boys” tungod sa ilegal nga paggamit og pagpayuhot sa ilegal nga druga murag bug-at gyud sa atong buot.
Kini tungod kay duha ka mga dagkong institusyon nga maoy pa gyuy tigpatuman sa balaud og katarungan ang nalambigit sa eskandalo.Wala ta magdahom nga mao kini mahitabo sa respitado unta nga mga institusyon ilabina sa DOJ. Mao pa gani pagsugod sa tuig mao na dayon ni ang misugat sa bag-ong tuig. Luyo sa nahisgutang kontrobersiya seguradong pipila ka grupo ang nalipay sa mga panghitabo sa kagamhanan sa kasamtangan.
kini walay lain mao ang mga sindikato sa droga. Seguro dagko kaayo ang ilang katawa karon tungod kay ilang gikataw-an ang eskandalo nga miguba sa kampanya sa kagamhanan batok sa mga ilegal nga droga og batok ngadto sa mga nagpakaylap niini sa atong nasud. Base sa data sa PDEA, ang Pilipinas na ang dunay pinaka-daghang migamit og ilegal nga mga droga sa Ecstacy, Ketamine. Cocaine, Shabu, Marijuana og uban pang matang sa ginadiling droga. Gani moabot og 198 ka mga sindekato sa droga ang nag-operate sa Pilipinas kundiin lima niining maong gidaghanon mga Trans-national drug syndicates. Tataw kaayo nga daghan na ang nabuang sa paggamit sa ginadiling droga sa Pilipinas tungod kay dili mo-click ang negosyo niini kung walay mga gumagamit. Gani ang Pilipinas na karon ang nag-unang kusog mokonsumo og ginadiling droga sa tibook Asya. Dili sa dakong kasayon mokaylap ang operasyon sa mga sendikato sa druga kung wala silay mga koneksyon diha sa mga ahensya sa gobyerno nga gitugyanan sa paggukod og pagsanta niining maong kalihukan.
Sakit kaayo ni nga kamatuoran. Makalolooy ang pobre og ultimo lamang nga mga otoridad nga maoy actual nga tigpatuman sa balaud sa kampanya btok sa droga. Bisan kinsa ma-demoralized sa mga hitabo karon tali sa DOJ og PDEA. Unsa paman ang atong malauman kung ingon ani nga mismong mga buhatan nga angayang manguna sa pagpatuman sa balaud ang nabahiran og mantsa ang kredibilidad? sila karon ang nagtigi og nagbinulgaray sa ilang mga baho imbes nga isentro unta ang ilang hiniusang puwersa aron pulboson ang mga sindikato og mga galamay niini nga ang kadaghanan anaa ra usab sa atong gobyerno.