Kadaugan ni Pacquiao yawe sa lain-laing interes

Hangtud sa oras sa gibansagang “The Dream Match” tali ni WBC Lighweigth Champion Manny Pacquiao og The Golden Boy Oscar De La Hoya, pabiling underdog ang Pinoy og llamado sa betting si De La Hoya. Apan ang tanang bintaha ng kalit nga nahanaw human sa pagbukas sa unang round sa gikahinamang dula sa tibook kalilbutan. Gihatag sa Pambansang kamao ngadto kang The ‘Golden Boy’ ang mas sobra pa sa ilang gilauman og daw nasulat na ang pasiunang chapter sa pagretiro sa Mexican boxing legend. Taliwala sa maong kadaugan daghan pa gihapon ang nagtuo nga duna pay ika-duha o kaha ika-tulong panagharong tali sa duha pinaagi sa rematch sunod tuig. Kini gumikan kay murag kumitido si Manny nga ika-harong usab ang Briton nga si Ricky Hatton, ang legitimate world welterweight champion kinsa nagpanikad usab nga makaaway si Pacman. Tungod sa maong away kagahapon, daw nalimtan sa mga Pinoy ang daghang mga problema ilabina ang nagkadaiyang isyu batok sa kasamtangang administrasyon. Sama sa naandan matag higayon nga mosaka sa ring ang Pambansang kamao, halos tibook nasud ang naghinubra sa kalipay og gisaulog sa managlahing paagi og tradisyon ang kadaugan sa giilang Bayani. Gani taliwala sa kalisud og kakulang sa kinitaan, kasagarang mga tricycle, Jeepney og mga trisikad drivers ang mihunong sa pagpamasada aron lamang makasaksi sa live coverage sa pay per view satelite feed sa away ni Manny og De La Hoya sa bisan asang bahin sa nasud. Bisan ang kasundaluhan , kapulisan og bisan na ang mga dautang elemento ng halos nakatutok sa pinakadakong sports event ning tuiga sa natad sa boxing. Kini maoy dakong kaayuhan nga matagamtaman sa nasud matag higayon nga mo-away ang Pambansang kamao nga nahimo nang idolo sa mga Filipino bisan sa kabataan og kababayen-an, gawas pa sa dakong dungog sa nasud sa tibook kalibutan. Kung unsa ta kalipay sa maong kadaugan ni Manny, naghulat usab ang dakong problema sa sobrang pamulitika dinhi sa Pilipinas. Seguradong gamiton na usab kining maong sitwasyon ilabina ang gikatakdang pagpauli ni Manny karong Miyerkules sa Pilipinas gikan sa las Vegas, Nevada. Klaro nang sakyan sa Malakanyang ang kasikatan ni Manny aron maminusan kung dili man mawala ang epekto sa gikatakdang charter change Inter Faith rally human gihingusgan gyud sa mga kaalyado ni Pangulong Arroyo ang lakang pag-usab sa konstitusyon nga gikabalak-ang gamiton aron malugwayan ang termino sa mga naglingkud nga mga opisyal sa gobyerno lakip na ang Presidente beyond 2010. Sa wala pa ang away ni Manny, daan nang gimobilize sa mga cause oriented groups pagpanguna sa mga relihiyusong grupo ang dakong kalihukan batok sa Cha-cha sa December 12 nga gilangkuban sa mga magtutungha sa mga katolikong tunghaan sa Metro Manila uban sa El Shaddai, Jesus Is Lord ministry ingon man ang Makati Business Club. Atong nakita nga kini maoy mgga posibleng rason nga mopauli dayon si Manny karong Miyerkules balik dinhi sa nasud, nga kasagaran mag-stay pa man unta ng pambansang kamao sa Amerika sulod sa usa ka semana human sa iyang kadaugan aron makapahulay og maselebrar ang iyang kadaugan uban sa mga Pinoy sa Amerika. Murag makaduda ning kalit nga pagpauli ni Manny nga posibleng gikumbinser sa mga kaalyado sa Palasyo nga nagpalibot kaniya sama kang deputy national security adviser Luis “Chavit” Singson og Environment secretary Lito Atienza lakip na si Vice president Noli De Castro. Pero kining tanan mga pagduda lang nga murag duol sa katumanan. Ato lang gipanghinaut nga dili itugot ni Manny nga magamit siya sa mga Tranditional politicians nga walay laing tumong gawas sa ilang mga interes.