Kapit-os dili babag paghandom sa mga minatay

Gideklara sa Philippine national Police (PNP) nga sa kinatibok-an nahimong malinawon ang pagsaulog sa Todos Los Santos og adlaw sa mga minatay sa tibook nasud. Matud pa ni PNP chief Director General Jesus Verzosa, nga iyang gibase ang deklarasyon sa taho nga iyang nadawat gikan sa mga regional offices sa nasudnong kapulisan. Gipasabot sa opisyal nga malinawon ang pagsaulog sa Adlaw sa mga patay gumikan sa operational readiness og plastadong napatuman ang security procedure og safety operations nga gihingusgan sa kagamhanan. Gawas sa pagdaut sa panahon sa pagkagabii samtang gisaulog ang Undas, bug-at nga dagan sa trapiko ilabina sa mga sementeryo og pipila ka aksidente sa mga sakyanan nga nasinatian, sa kinatibok-an nahimong malinawon ang kasaulogan. Dako gyud kaayo ang natabang sa liquor ban nga nakunhuran ang mga kagubot sa lain-laing bahin sa nasud matag higayon nga saulogonn ang Todos Los Santos og adlaw sa mga patay. Atong gidayeg ang kamatinud-anon sa atong mga otoridad lakip na sa mga ahensya sa kagamhanan sama sa LTO, PNP og DPWH nga hugtanong nakig-koordinar sa Oplan Kaluluwa sa kagamhanan. Hinuon dili kalikayan nga dunay mga otoridad nga badlungon gyud lakip na ang pipila ka mga miduaw usab sa mga sementeryonga ang uban nagdala og mga ilimnong makahubog sulod sa mga sementeryo. Bisan sa ka-moderno na sa atong panahon karon, duna pa gihapoy mga Pilipino nga nagsubay sa kinaraang paagi sa paghandom sa mga namatay na nilang mga minahal sa kinabuhi sa ilang pagduaw sa mga lubnganan. Kini mao ang paghalad og mga pagkaon, mainom, segarilyo og uban pa nga daw buhi ang ilang kabanay nga gidadlhan og pasalubong. Ang maong batasan, dili hinuon dautan gumikan kay kitang tanan managlahi og paagi sa pagpakita sa atong paghatag og importansya sa atong mga kabanay nga mitaliwan na sa laing kalibutan. Pero, kung atong ikumpara kaniadto, dili kaayo daghan ang nagbuntag sa mga sementeryo, gani daghan usab ang wala na nakabisita sa lubnganan sa ilang mga kabanay ilabina kadtong atua na sa lagyong mga lugar nga wala na lamang mipauli tungod sa kalisud na gyud sa panahon ilabina sa panalapi. Daghan ang nagpa-misa na lamang sa mga simbahan kondiin sila nahimutang og nagdagkot og kandila sa dakong Cross sa lugar duol sa ilang nahimutangan. Tungod kini sa mga praktikal nga mga rason. Ang importante nga ato pang gihinumdom ang atong mga mipanaw na nga mga minahal sa kinabuhi og mga kabanay.