Lihok sa Ombudsman

Kudos sa Ombudsman! kini human gisugdan na sa ahensya ang imbestigasyon sa eskandalo sa sinuhulay sa kaso sa gibansagang “Alabang Boys”. Matud ni Ombudsman Mercidetaz Gutierez nga ila gilayong gisughdan ang imbestigasyon pagbuto pa lamang sa kontrobersiya sa nahisgutang drug case. Bisan paman, wala mihatag og detalye si Gutierez sa estado sa gihimong imbestigasyon.
At least magpasalamat ta sa Office of the Ombudsman sa gipakitang aksyon gilayon sa kontrobersiya nga gilambigitan sa mga DOJ prosecutors og PDEA, bisan tuod nga hinay kaayo ang mga lihok sa maong ahensya nga gitahasan pag-imbestiga sa mga anomaliyang gilambigitan sa mga public officials sa nasud. Apan kulang pa gihapon ang maong lakang bisan og gipaneguro ni Gutierez nga kung mapamatud-an matud pa nga nalambigit sa suburno ang mga DOJ Prosecutors, ila gilayon kining pasakaan og tukmang kaso. Manghinaut nalang ta nga ning tuiga, mopakita og maka-impres nga performance ang Office of the Ombudsman gumikan kay sulod na sa pipila ka tuig puwerting daghana sa mga kaso nga nagpabiling pending pa gihapon sa buhatan, samtang daghang mga anomaliyang gituki ang nakalusot ang mga responsable.
Hinuot unta nga magmalampuson og magmatinud-anon ang Ombudsman sa pag-imbestiga usab niini sa mga private lawyers nga matud pa kanunay makitang magtambay sa Department of Justice atubangan sa kontrobersiyang giatubang sa ahensya tungod sa kaso sa suhulan sa kaso sa “Alabang Boys”. Kung tinuod ang giingon ni Gutierez, usa kini ka pagpanglapas sa maong mga abogado sa code of ethics ilabina nga dili taga DOJ ang ilang mga kleyente. 23 ka tuig nga nahimong kabahin si Gutierez sa DOJ hinungdan nga dako ang akong pagtuo nga mas lawom ang iyang kasayuran sa mga palakaw sa maong ahensya.
Dako ang akong paglaum og panghinaut nga dili lang unta mosangpot sa wala o kaha ma-whitewash ang kaso sa DOJ og PDEA. Kinahanglang ipakita sa Ombudsman nga mas labaw’ng nagkinahanglan og katarungan og katin-awan ang publiko .
Ang kamanduan ni Pangulong Arroyo nga angayang mag-leave of absence ang mga DOJ prosecutors ang gibatikos sa mga huwes o ilang gihagit ang presidente nga angayang hagiton usab ang mga taga-PDEA nga sama kanila magbakasyon una samtang sugdan na ang imbestigasyon sa kaso. Ning maong hitabo angayang basuolon usab ang pangulong Arroyo gumikan kay siya ang dunay derektang control sa mga taga-DOJ og PDEA gumikan kay siya ang nag-appoint sa mga opisyal nga naglingkud sa maong mga ahensya.
Dili na usab karon panahon alang sa duha ka ahensya ang magbinasulay,. Mas maayong mopadayon na sa ilang mga trabaho ilabina sa kasamtangang kontrobersiya tungod kay nakasalalay niini ang kridibilidad sa hustisya sa nasud.