Ayuda alang sa Pinoy

HAYAG ANG KAHIGAYONAN nga maayudahan ang Pilipinas og $20-milyon nga salapi gikan sa ‘Langyaw’ng Komunidad’ agi’g hinabang sa mga pobre dinhi sa nasod.Ang maong kantidad pinaagi sa Millennium Challenge Corp. (MCC) nga maoy magpagawas sa ayuda aron matabangan ang katawhan kansang sitwasyon karon pobre pa sa ilagang pawo Kung makapasar ang nasod sa ipahigayong evaluation sa unang quarter sa tuig 2009, dayag nga makab-ot gayod sa katawhan sa nasud ang nahisgutang kantidad.
Ang gitan-aw karon nga basihan sa MCC mao ang pagsukod sa kamatinud-anon sa administrasyong Arroyo sa pagpaningkamot niini sa pagsulbad sa kuyanap nga korapsyon. Korapsyon ang nakababag niining tanan. Mipagawas dayon og ‘Anti-graft and corruption campaign’ ang panggamhanan sa tanang buhatan pang-gobyerno og mga opisyal niini.Seryoso karon ang gimugna nga kampaniya sa gobyerno batok korapsyon gumikan dili na masud-ong ang hilabihang pangurakot sa pipila ka opisyal nga hangtud sa pagkakaron nagpahilom-hilom.
Kung magpadayon ang korapsyon, magpadayon ang katawhang Pilipinhon nga dili kadawat sa ayuda gikan sa MCC, magpadayong magtamoy si Juan dela Cruz sa tudlo diha sa kagutom nga padayong nasinatian karon. Miluwat og pamahayag si Finance secretary Margarito Teves nga himuon sa maong buhatan ang tanan, aron makab-ot ang hinabang sa MCC. Dugang sa hintungdan nga unahon ang pagsulbad sa nagtapun-og nga dagkong kaso sa pangurakot gumikan mao kini ang unang gipangayong kasulbaran sa MCC.
Usa sa mga rason usab mao ang pag-ulbo sa ZTE-broadband network deal scandal diin nabahiran ang dagkong mga pangalan sa mga opisyal sa gobyerno gumikan sa maong kontrobersiyal nga kaso. Wala nahinayon ang ZTE deal dihang nabulgar sa publiko ang pagpanuhol sa pipila ka opisyal nga sa gobyerno human gibulgar ni Jun Lozada ang tana niyang nahibaw-an kalabot sa kontrobersiyal nga transaksyon.Ang kampanya karon sa gobyerno batok korapsyon gipakusgan diha sa pagmuntar sa mga paagi nga maoy mohinlo sa imahin sa Pilipinas nga luwas na sa hisgutanang korapsyon.
Dako ang kahigayonan sa katawhang Pilipinhon nga madawat gayod ang maong hinabang pinaagi sa mga opisyal sa administrasyon nga sa kasamtangan naningkamot sa pagsulbad sa kasong korapsyon sa matag buhatan pang-gobyerno. Ang katawhan misalig sa kampaniya aron ang ayuda sa MCC nga alang sa mga pobre madawat sa dili madugay. Unta mao kini ang butang aron mahaw-as ang katawhan sa nasinatiang kagutom diha sa pagpanag-uban sa pamilya nga dala ang matuod nga kalinaw, panagsabot sa mga maayong plano aron sa pag-andam sa maayong ugma sa mga anak.