Paglaum sa bag-ong tuig

Atubangan sa hulga sa global financial crisis sa 2009, migawas sa survey sa Social Weather Stations (SWS) nga siyam sa matag napulo ka mga Pinoy kon 93-percent sa populasyon sa Pilipinas ang mitubag sa survey nga ilang sugaton ang bag-ong tuig 2009 nga puno sa paglaum imbes nga kahadlok og kabalaka.
Susama usab niini nga survey ang gipahigayon sa SWS niadtong tuig 2006 og 2007 kundiin migawas nga 91-porsiento usab ang nag-ingon nga may paglaum sa pagsulod sa bag-ong tuig.Karong tuig 2008, 94-porsiento ang nagbutyag nga duna pay dakong paglaum sa 2009 alang sa mga taga[-Visayas , 92-porsiento sa Luzon og Mindanao samtang 89-porsiento usab sa National Capital Region (NCR). Matud pa sa survey sa SWS nga sa kinatibok-an 94-porsiento sa mipadayag sa survey mga adunahan og mga middle class level samtang ang 90-porsiento mga kabus.
Bisan unsa pa tingale nga kalisud nga gikalinsangan sa ubang kanasuran ilabina ang mga adunahan ,apan ang mga Pinoy nga anad na sa kalisud og paningkamot daw balewala lang ang dakong hulga sa kalisud sa ekonomiya bunga sa Global financial melt down. Mao lang pud ni nakanindot natong mga Pinoy kay daghan kanato ang kontento na sa kahimtang hinungdan nga dili kaayo ta makurat sa mga kalisud og unos nga mohapak sa tagsa-tagsa nato ka kinabuhi.
Ato ning makita sa kinaiya nato panahon sa mga selebrasyon sama sa piyesta, Pasko og pagsugat sa bag-ong tuig ingon man sa mga birthday celebrations kay bisan og walang wala gyud, kasagaran maghikay gyud bisan simple og ginagmay lang. Murag natural na gyud kanato nga malipay bisan sa ginagmay’ng kaayuhan nga madawat. Pero mao lage usahay masobrahan kay daghan naman hinuon pod ang mapasagaron og gitugyan nalang sa swerte ang dagan sa kapalaran. Matag panahon sa pagsugat sa bag-ong tuig kasagaran gyud kanato magpalihi sama sa pag-halad og 13-ka klase sa mga lingin og tam-is nga mga prutas aron mosulod ang swerte. Gawas niini duna pay nagkadaiyang seremonyas og mga tinuhuan ang matag pamilyang Pilipino matag bag-ong tuig sa paglaum nga kung gidimalas man sa biyaang tuig, at least swertihon na sa bag-ong tuig. Wala may dautan sa pagsunod sa tradisyon nga sulod sa dugay nang panahon nga gina-practice sa atong mga katigulangan, pero ang suma total aning tanan kung dili ta maningkamot, di magsilbe ang mga palihi kay matud pa lagi sa panulti-on “Life is what you make it” busa seguro kung mapasagaron lang ta sa mga opurtunidad dili kaayo makakab-ot og kalampusan.