Taliwala sa kalisdanan sa kahimtang sa mga Pilipino ilabina dinhi sa Mindanao, nagka-grabe usab ang mga linuog og pagsabwag og kagubot sa nagkadaiyang kriminal og mga rebelde. Ang mga sakop sa Lawless Moro Islamic Liberation Front (MILF) nagpadayon sa ilang mga pagpangatake sa mga civilian populated areas sa Lanao Sur og Norte, Central Mindanao og Sarangani ning milabay’ng mga semana kundiin ubay-ubay nang mga inosenteng sebilyan ang nangamatay nga wala man untay labot sa gipasiatab nilang pakigbisog alang kuno sa Bangsa Moro people. Gaws sa mg sundalo nga nakalas sa mga engkwentro sila usab mismo sa MILF ang ubay-ubay na usab ang nalagas sa ilang pakigbatok sa gobyerno.
Tungod sa maong mga panghitabo, kasagaran sa mga katawhan ang nagbaton na og kasilag og kahadlok sa posible pang kadaut og kaluog nga posibleng ipatagamtam sa MILF lawless elements ngadto kanila ilabina ang mga apektadong dapit sa Mindanao. Ang gobyerno sa ilang bahin kusganong mibarog sa bag-ong estratihiya sa prosesong pangkalinaw kundiin hangtud dili mag-disarma ang MILF walay negosasyong pangkalinaw og kung duna man, magpadayon ang police operation sa militar paggukod sa upat ka mga kumander sa MILF nga gitumbok nga nagpaluyo sa nagkadaiyang civilian targets aron sila patubagon sa salaud nga ilang gihimo.
Hinuon nagpatabang ang Malakanyang sa mga Obispo sa simbahang katoliko og protestante ingon man sa mga Ulam sa Muslim aron maoy derektang makig-koordinar og molusad og mga dayalogo sa mga kumunidad alang sa pagtapos na sa rebilyon sa Mindanao og uban pang bahin sa nasud.
Dinhi na nga punto, nagpagawas og pahimangno ang pamunuan sa Moro Islamic Liberation Front (MILF) ngadto sa mga obispo og mga Ulama nga angayang ma-preserba matud pa ang ilang integridad isip mga Muslim og isip usa ka institusyong dunay gibarugang mga kultura og idealismo. Ang maong punto tinuod og angayang tahuron og ampingan. Apan wala ba nakapangutana si MILF Committee on Information Deputy Chair Khaled Musa ingon man ang kadagkuan sa MILF, kung unsay implekasyon sa gihimong lakang sa badlungon nilang mga kumanders? Sila ra pud mismo ang nag-guba sa ilang kridibilidad og hangtud karon wala gyud sila maka-desiplina sa ilang sakop.
Ang respito kinahanglang magagikan mismo sa kaugalingon. Angayan unta nga bantayan mismo sa kadagkuan sa MILF ang ilang mga sakop nga dili sab maka-distroso sa katungod sa uban kung tinuod silang nagbarog sa usa ka kawsa sa kabag-ohan.Kining mga ulahing binuhatan nila ni kumander Bravo, Kato, og Pangalian, angayan bang respituhon? dili ba angayan lang silang kondinahon sa pinaka-taas nga level sa pagpanghimaraot? Ang pagpamatay sa mga inosenteng sebilyan og pagpangsunog sa kabalayan og propedad sa mga sebilyan binuhatan sa mga terorista og walay giilang balaud.
Samtang sa pikas bahin kining mga Rebeldeng New People’s Army (NPA) nga pugsanong nagpakita sa ilang presensya pinaagi sa mga pagpang-harass sa mga instolasyon sa kagamhanan lakip na ang mga prebadong sektor pinaagi sa pagpamatay sa walay kalaban-laban nga mga sebilyan resulta sa mga desisyon nga nakab-ot kuno sa ilang Kangaro court, dili ba usab angayan nga atong ipanghimaraot? Ang pinaka-ulahing pagpanghipos sa mga NPA sa giila nilang mga kaaway tungod kay nakahatag kuno og hulga sa ilang grupo, naka-among og nakapatay og inosenteng bata sa Comval. Human sa maong hitabo, igo lamang nagpagawas og statement ang mga kumunistang rebelde nga nangayo og sorry.
Ingon na lang ba gyud ini kanunay ang senaryo sa atong katilingban? kanus-a pa man matapos ang kawalay kasegurohan sa kinabuhi sa mga inosenteng sebilyan nga maoy kanunay’ng madamay sa mga mini nga pakigbisog nga kung atong tan-awon alang lamang sa tagsa-tagsa nila ka interes. Pipila pa kaha ka sorry ang gi-andam sa mga rebeldeng NPA? Sila mismo ang hinay-hinay nang mipatay sa gipakigbisogan nilang kawsa nga alang sa kinabag-ang kabus nga katawhan.
No comments:
Post a Comment