Bolante, mopauli nga walay tulobagon

Samtang nagkabuang na ang ubang nasud gumikan sa nasinatiang economic crunch sa Amerika nga gisundan sa Europe og Japan nga naghatag og dakong epekto sa tibook kalibutan, dinhi sa Pilipinas murag nagka-grabe ang mga scam og eskandalo nga gilambigitan sa mga opisyales sa gobyerno. Pinaka-ulahi niini ang eskandalong gihatud sa gitawag na karon nga mga “Euro generals” nga sila si retired PNP Comptrollership chief Eliseo De La Paz og mga kauban kansang grupo ang nasakpan sa Moscow airport dala ang halos 7-milyunes pesos cash nga sobra sa gitugot sa Russian immigration nga kantidad nga puwedeng dalhon sa mga langyaw.
Niadtong Huwebes gisugdan sa Senate Committee on Foreign relations ilawom sa chairmanship ni Senadora Miriam Santiago ang imbestigasyon sa “Moscow scandal” kundiin gilabhan og maayo sa senadora og uban pang mga senador sila si DILG secretary Ronaldo Puno og PNP Director General Jesus Verzosa. Si De La PAz nga wala mipatim-aw sa hearing sukwahi sa iyang gipasiatab sa iyang pag-abot sa nasud, daw mitugot nga husgahan na siya sa katawhan og sa mga senador mismo. Ang gibuhat man gud ni De la Paz nga pagtago mipasamot sa pagduda nga anomaloso gyud ang maong kantidad nga iyang bitbit sa Moscow. Daghan karon ang nag-ong-ong nga pangutana. Samtang sa pikas bahin wala pa gani nakabalik sa nasud si kanhi Agriculture Undersecretary Jocelyn ‘JocJoc’ Bolante, nagpagawas na og pamahayag ang office of the ombudsman nga dili makalaboso ang kontrobersyal nga opisyal. Kini gumikan kay wala pay kasong napasaka batok kang Bolante may kalabutan sa pagkalambigit niini sa P728-million fertilizer scam nga giingong gigamit sa kampanya ni pangulong Gloria Macapagal-Arroyo sa 2004 presidential elections. Gumikan kay wala pay napasakang kaso, wala pay mahimo nga kongkretong lakang ang gobyerno may kalabot sa mamahimong kondisyon ni Bolante sa iyang pagbalik sa Pilipinas sunod semana. Kung wala man diay mapasakang kaso ang gobyerno batok kang Bolante, dako kaayo ang posibilidad nga makalingkawas si “JocJoc’ sa gilambigitang ‘fertilizer scam’. Bugtong obligasyon lamang ni Bolante sa iyang pagbalik sa nasud mao ang pag-atubang sa senado og kamara nga seguradong mag-imbestiga sa kontrobersiya og ihatag ang kumpletong detalye sa nabulabog nga anomaliya. In aid of ligeslation lamang kutob ang senado og kamara sa mga imbestigasyon sa bisan unsang anomaliyang gilambigitan sa mga opisyales sa gobyerno. Kini maoy atong gikabalak-an nga basin og walay kapaingnan ang gipasiatab nga kaso batok kang Bolante gumikan kay wala man diay nag-andam ang gobyerno ilabina ang mga magbabalaud. Sa pamahayag ni senador Piya Cayetano nga maoy officer-in-cahrge sa senado samtang atua sa Europe si Senate president Manny Villar, klaro kaayong wala nangandam ang mga magbabalaud sama gihapon sa nahitabo kang De La Paz nga dili mahimong arestuhon sa senado taliwala sa mando ni senador Santiago gumikan kay kinahanglan pang mosubay sa mga legal processes. Sulod sa taas nga panahon, wala diay gihimo ang gobyerno sa kaso ni Bolante og karon nga bulontaryo na kining mopauli sa Pilipinas mahulog sa wala ra diay gihapon ang tanan.